ءباتيما تاپال قىزى تۋعان حالقنىڭ قادىر- قىمباتىنا كەنەلگەن، ءوزىندىك سالاۋاتى بار، ەلىنە بورىشتارلىقپەن شىنايى ەڭبەك ەتە بىلگەن، ءومىر ىزدەردى ونەگەگە تولى تۇپ- تۇنىق ءمولدىر جىرلارىمەن وقىرمان جۇرەگىنەن جول تاپقان اقىن، حالقىنا ەسەلى ەڭبەك سىڭىرگەن حالىقتىڭ قالاۋلى قىزمەتكەرى، ۇزدىك پارتيا مۇشەسى، ەرەكشە دارەجەلى وقىتۋشى، ايماقتىق جازۋشىلار قوعامنىڭ مۇشەسى ءباتيما تاپال قىزى 1950- جىلى اقپاندا التاي ايماعى قابا اۋدانىنىڭ كولباي اۋىلدىعىندا مالشى وتباسىندا دۇنيەگە كەلگەن. كوز قاراقتى اكەنىڭ، يناباتتى شەشەنىڭ تاربيەسىندە بولىپ، 1957- جىلدان 1964- جىلعا دەيىن كولباي اۋىلدىق تاسقالا مەكتەبىندە باستاۋىش جانە ورتالاۋ وقىعان. 1964- جىلى قىركۇيەكتە ايماقتىق 1- ورتا مەكتەپتىڭ پەداگوگيكا كلاسىنا وقۋعا ءتۇسىپ، 1968- جىلى مەكتەپتى ۇزدىك ناتيجەمەن ءبىتىرىپ، قىزمەتتىڭ العاشقى قادامىن تۋعان اۋىلىنا وقىتۋشى بولۋداي داڭىقتى مىندەتپەن باستاعان. ول جيىرما جىلدىق وقىتۋشلىق ساپارىندا كولباي اۋىلدىق قاراشلىك قىستاعىندا، اۋىلدىقتا، قابا اۋداندىق 2- باستاۋىش مەكتەپتە قىزمەت جەتەكشىسى بولىپ، ۇلتتىق وقۋ- اعارتۋ ءۇشىن ءبىر كسلىك ۇلەسىن قوسقان. ول ىلعي دا مىندەتتىڭ اۋىرىن ارقالاپ، وزىنە قاتاڭ تالاپ قويىپ، اتا- انالاردىڭ ۇمىتىنەن، وقۋشىلاردىڭ تالابىنان شىعىپ، اشتى تەرىنىڭ ءتاتتى جەمسىن تاتىپ، وزات وقىتۋشى، ۇزدىك پسىقتاۋ جەتەكشىسى، 8- مارت قىزىل تۋشىسى بولىپ تالاي رەت سيلانىپ، داڭىق تورىنەن كورىنىپ وتىرعان.

1984- جىلى قىركۇيەكتە ۇيىمنىڭ ۇيعارىمى بوينشا قابا اۋداندىق ساياسي كەڭەستىڭ كەڭسە حاتشىسى بولىپ قىزمەت ىستەگەن. ءومىر بويى ۇيرەنۋدى كۇندەلىك تۇرمىسىنىڭ قاعيدالى ادەتىنە اينالدىرعان ءباتيما تاپال قىزى وزىنە قاتاڭ تالاپ قويا وتىرىپ، جۇكتەلگەن مىندەتتى تىڭعىلىقتى اتقارىپ ۇيىمنىڭ سەنىمىنە بولەنىپ، 1986- جىلى داڭىقپەن جۇڭگو كوممۋنيستىك پارتياسىنا مۇشە بولدى. 1998- جىلى التاي ايماقتىق قازىنا مەكەمەسىنە اۋىسپ كەلىپ قىزمەت ىستەگەن.

ول بۇل بارسىتا دا ىزدەنگىشتىك رۋحپەن وزگەلەرگە باستاماشى بولدى. ءوزىنىڭ قاجىرى مەن قابىلەتىنىڭ ارقاسىندا كوپ جۇكتەگەن ءارقانداي مىندەتتى تىڭعىلىقتى ورىنداپ، ەل جۇرەگىنەن ورىن الىپ، وبلىستىق ساياسي كەڭەس قوس وزاتتار ۋاكىلى دە بولىپ سايلانعان. 1998- جىلى جەلتوقساندا داڭىقپەن زەينەتكە شىققان. ءباتيما تاپال قىزى وزىنە جۇكتەلگەن اۋىر جۇكتى ارقالاپ، جۇرتتى ريزا ەتۋمەن بىرگە، وتباسىنا جاراسىمدى جۇباي، قامقور انا بولا ءبىلىپ، ءوز باسىنان تاماشا ونەگە جاراتىپ، ۇرپاقتارىن جەتەلى ەتىپ تاربيەلەگەن، اناسىنىڭ اق سۇتىمەن بىرگە ونەگەسىن بويلارىنا ۇيالاتقان بالالارى قازىر قوعامنىڭ ءار سالاسىندا ماڭىزدى قىزمەتتەر ىستەپ، قوعامعا ەسەلى ۇلەس قوسىپ، حالىقتىڭ ماقتانشىنا اينالۋدا.

ءباتيما تاپال قىزى قىزمەتتەن تىس ۋاقىتتارىندا ءوز بويىنا بىتكەن ەرەكشەلىگى - اقىندىق ونەرىن دە جەتىلدىرىپ، وقىرماندارىنا جەمىستى ناتيجە سيلادى. شىنايى شابىتتان تۋىنداعان قىراننىڭ ءمولدىر سۋىنداي سىرلى ولەڭدەرى رايونىمىز كولەمىندە شىعاتىن ‹‹ شۇعىلا››، ‹‹ شينجياڭ ايەلدەرى››، ‹‹ شينجياڭ گازەتى››، ‹‹ التاي اياسى››، ‹‹ التاي گازەتى›› قاتارلى باسىلىمداردا ۇزبەي جاريالانىپ وتىردى ءارى ‹‹جەتى قابا جىرلارى›› اتتى جىر الماعىندا ءومىر بايانى تانستىرىلىپ، 13 ولەڭى ورىن الدى. ‹‹قايىندار- اي›› اتتى ءان تەكستى شينجياڭ ۇيعۇر اۆتونوميالى رايون قۇرىلعاندىعنىڭ 50 جىلدىق بايقاۋىندا 1- دارەجەلى جۇلدەگە يە بولدى.

قاجىرلى دا قاراپايىم، اق كوڭىل، اشىق- جارقىن ءباتيما تاپال قىزى حالىقىنا 30 جىلداي قىزمەت ەتىپ، داڭىققا بولەنگەن، باسىنان ىستىق پەن سۋىقتى ءبىر كىسدەي وتكىزىپ، اياۋلى ۇل- قىزدارىن ارمانىنا جەتكىزىپ، ولاردىڭ قىزىعىن كورىپ، ءومىردىڭ راحاتىنا كەنەلەر شاعىندا، داۋالاۋ ءونىم بەرمەي، 2006- جىلى قىركۇيەك ايىنىڭ 1- جۇلدىزى جەرگىلكتى ۋاقىت ساعات 11 دە پانيدەن باقيعا كوشكەن.